فاتت سنة وادورت
ولا أى حاجة اتغيرت
نفس الكلام
اللى سمعناه من زمان
نفس الكلام
دى مصر مرصودة
ومحسودة كمان
واجندة فيها اتنفذت
وفلوس كتير اتوزعت
جوه الميدان
نفس الكلام
عشان ما نخربش البلد
بلاش مظاهرات واعتصام
يعنى.. نبطل ثورة
علشان الأمان
طب احنا عاوزين المطالب
اللى ضحينا عشانها
عاوزين رغيف
وما فيش رغيف
غير بالطابور
يبقى ها نقعد ع الرصيف
عدة شهور
عاوزين حوار
ومافيش حوار
يبقى ح نكتب على الورق
وعلى الجدار
بعض السطور
عاوزين عدالة
ما فيش عدالة
البرلمان ياخد قرار
ويكون له دور
عاوزين قصاص
وما فيش حياة من غير قصاص
دا إللى ما متش من الرصاص
نزلت طيور سودة عليه
أكلت عينيه
عاوزين كبير
ما يكونش رائد أو مشير
ما يكونش لابس بدلة فيها سيوف كتير
ما يكونش لابس جزمة بوت برباط كبير
ويكون كواحد مننا
يقدر يجيب لنا حقنا
ما يردناش
ما يقولناش
هاتوا الشهيد يشهد هنا
مين إللى ضربه بالرصاص
ما يقولناش
هاتوا اللى مفقوعة عينيه
يجى ويتعرف عليه
ما يقولناش
هاتوا البنات إللى كشف على جسمهم
راجل غريب
إيه يعنى لما يكون
ده ضابط أو طبيب
ما يقولناش
عاوزين كرامة .. خدوا كرامة
وما تطلبوش أمن وأمان
طول ما انتو قاعدين فى الميدان
مايقولناش على بنت عروا جسمها
إيه إللى نزلها الميدان
وإزاى أبوها سمح لها
تهتف كمان
ما يقولناش
عاوزين عدالة
مفيش عدالة ف مصر
على مر الزمان
حرية إيه من غير عدالة تضمها
وكرامة إيه .. من غير أمان
وأهى مصر أهى اتعرت هدومها
ولحمها على الخلق بان
وإزاى حنسكت ع الهوان
فاتت سنة وادورت
ولا أى حاجة اتغيرت
حتى المطالب كلها
ما اتحققت
نفس الكلام إللى سمعناه من زمان
نفس الوجوه
لبست قناع واتصدرت
نفس الوجوه
فوق الكراسى اتصورت
وهللت
وكبرت
ولا أى حاجة اتغيرت
