السؤال الأول : التعبير أكتب مالا يقل عن 650 سطر في أحد الموضوعات التالية:
1- لم يجد الطفل غير الشارع ملجاً نظراً لحالة البلد الهباب فأتجه إلي السرقة و القتل و الحشيش ... حتي نال جزاءه و قبض عليه متلبسا بباكتة بانجو .. اكتب قصته مع تسليم الحِرز للباشا مراقب اللجنة .
2- شهد بلدنا الحبيب نهضة في مجال التشييد و البناء و خصوصا بعد وصول سعر الحديد إلي 8000 جنيه للطن و احتمالات بالزيادة ....... اكتب ما يمليه عليك ضميرك علي أن يبدأ موضوعك بعبارة ( أنا باشتغل في حديد محسن ) .
3- بعد انتشار ظاهرة أكل لحم الكلاب و الحمير .......من وجهة نظرك كحمار تكلم عن هذه الظاهرة و من المتسبب فيها بدون غلط .... الورق متراقب .
السؤال الثاني : القصة
من قصة "وعهد الله ما أنت داخل الانتخابات" أقرأ القطعة ثم أجب عن الآتي : "ثم أتى وضربه بالجزمة وقال: أنت عايز تترشح في الانتخابات ياد؟، دا أنت عايز معجزة ....مش كفاية بتاكلوا لحمة ومستورين...عايز إيه تانى؟
1- ما هي اللحمة ؟ أو علي الأقل حدد أقرب معني خيالي لها .
2- مرادف معجزة فى اللغة العربية (تغيير وزارى ، زيادة فى المرتبات ، رغيف العيش) اختر يا مقلول البخت
3- اختر لماذا ضربه بالجزمة وليس بالعصاية مثلاً؟؟ (كسل منه .. هو لسه ها يرفع العصاية - علشان العصاية قلة قيمة برده واحنا فى عصر الديمقراطية، علشان العصاية شغالة بس مش فى الضرب فى حاجات تانية .. افهم انت بقى ) .
4- حلل بمزيد من التفصيل جملة ( ضربه بالجزمة ) و مدي توافقها مع جملة ( مصر بتتقدم بينا ) .
السؤال الثالث : القراءة
من موضوع "الزعيم ...الفنان...القدوة" أقرأ القطعة ثم أجب "وقد نفي الزعيم الإشاعات التي أكدت أنه مرشح لوزارة الثقافة...وأكد أنه فنان فقط وليس سياسياً كما أنه مقتنع بكل سياسات الحكومة".
1- في رأيك هل يصلح الزعيم لوزارة الثقافة أم لوزارة الصناعة أنه صرح في أحد أفلامه أنه بيحب المَكن ؟؟
2- ذكرنا في الدرس أن الزعيم صاحب البوس الهادف سيتقاضي في فيلمه القادم 12 مليون جنيه .... في رأيك ياعم المحروم تبقي البوسة بكام في الفيلم ؟؟
السؤال الرابع : النصوص
من نص " ماشربتش من نيلها " . اقرأ ثم أجب :
" ماشربتش من نيلها..جربت تغنى لها...جربت في عز ما تحزن تمشي في شوارعها وتشكى لها" .
1- ذكر في الجرائد أن صاحبة النص أرادت أن تلد ابنتها في أمريكا لتحصل علي الجنسية الأمريكية .... اختر... ما المقصود بنيلها في النص ؟
( المسيسبي – الأمازون – يونج يانج )
2- هذا النص من نصوص الحزب الحاكم و الدليل وجود اسم مهم من قيادات الحزب في النص . استخرج الاسم ؟ .....
3- أكمل النص حتي الآخر ؟
4- قوبل النص بانتقادات بسبب ابتعادة عن الواقع ... وضح من النص ما يتفق مع القول المأثور ( اطبخي يا جارية كلف يا سيدي ) .
السؤال الخامس : النحو
1- أعرب ما تحته خط ... لو مالقيتش القطعة .... اتصرف !
2- ( ذهب الرئيس إلي المؤتمر ) .. ضع الجملة السابقة في صيغة المثني .. ما عد الرئيس طبعاً يا مفتح .
3- ( كان صاحب العبارة الغارقة قاتلاً ) ... ضع إن مكان كان ... علي ألا تنصب صاحب ... علشان هوه معروف و بينصب لوحده !!
4- فُرضت الضرائب علينا ببشاعة ... أعرب الجملة ... و ارفع الضرائب أبوس إيدك .
انتظروا نموذج الإجابة
ليست هناك تعليقات:
إرسال تعليق